அதிகாலை ரயிலில் ஸ்வேதாவும் பிரபுவும் வந்தது முதல் களைகட்டி கலகலப்பாயிருந்த வீடு, சற்று அமைதியாயிருந்தது. மாமனார், மாமியாருடன் சம்பிரதாயமாக சில வார்த்தைகளைப் பேசிவிட்டு, பிரபு அதே ஊரிலிருந்த தனது உறவினர்களை சந்திக்கக் கிளம்பிவிட்டான். மகள் வந்த மகிழ்ச்சியில் திளைத்த ரமாபிரபா, காய்கறி, மளிகை வாங்கக் கடைத்தெருவுக்குக் கிளம்பிவிட்டாள். பயணக்களைப்பில் சிறிது நேரம் அயர்ந்து உறங்கிய ஸ்வேதா, கண்விழித்ததும் குளிக்கக் கிளம்பினாள். திருமணத்துக்குப் பிறகு, முதல் முறையாக தாய்வீடு வந்த மகிழ்ச்சியும், ஷவரிலிருந்து கொட்டிய சில்லென்ற தண்ணீரும் அவளுக்குப் புத்துணர்ச்சி அளித்தது. குளித்து முடித்தவள், தலையில் டவலைச் சுற்றிக்கொண்டு, தொளதொளவென்று ஒரு பைஜாமாவும் மெல்லிய டி-ஷர்ட்டும் அணிந்தபடி வரவேற்பரையை அடைந்தபோது, தர்மராஜ் டிவியில் கிரிக்கெட் பார்த்துக்கொண்டிருந்தார்.